EXPOSICIÓN PERMANENTE: A indumentaria

O traxe tradicional pódese dividir en dous grandes grupos: de cotío ou faena e de garda ou gala, moito máis complicado e rico este có primeiro, tanto pola calidade dos tecidos como pola variedade das pezas e riqueza dos adobíos e complementos.

Dependendo da ocasión, a zona e as posibilidades, a muller viste camisa, enaguas, refaixo, saia ou vasquiña, mantelo, mandil, xustillo e dengue ou chaquetilla, pano do busto, mantón ou pano de oito puntas, e cobre a cabeza con pano, cofia ou mantela. O home leva camisa, cirolas, calzón, chaleco, chaqueta, faixa, e tócase con pucho, monteira ou tella. O calzado é, en ambos os casos, zocos ou zocas para os días de cotío e zapatos co traxe de gala.

En Galicia fanse finísimos labores de encaixe de palillos, coñecido como de Camariñas por ser a zona onde se concentra maiormente a comercialización da produción, espallada polo litoral coruñés entre Noia e Malpica.

As palilleiras adoitan ser mulleres e fillas de pescadores, que contribúen con esta tarefa á economía familiar. Os seus útiles son a almofada e os palillos. Sobre a primeira fíxase o cartón co deseño, que se pica cos alfinetes aos que se amarran os fíos envoltos nos palillos; o xogo destes require gran atención e habelencia.