A proposta, elaborada por unha comisión designada polas institucións amentadas, na que o Museo estivo representado polo presidente da Xunta Reitora, Justo Beramendi, pretende "recoñecer como un elemento singular da identidade galega e da súa continuidade histórica o Panteón de Galicia e proceder a regular a súa xestión, uso e conservación, así como a determinación de quen pode ser digno de honra no dito Panteón e do procedemento para levalo a cabo".

O Panteón de Galicia, como parte do patrimonio inmaterial do pobo galego e elemento singular da súa identidade, debe desempeñar "un papel vivo e activo como lugar de encontro, de aprendizaxe e de alento do sentir da comunidade dos galegos dentro e fóra do país".

Con este acto culmina un proceso que se remonta ao 20 de abril de 2006, cando na comparecencia do presidente do Padroado do Museo, Isaac Díaz Pardo, e do propio Justo Beramendi perante o Parlamento de Galicia se fixo unha proposta expresa sobre a necesidade de "desbloquear a situación do Panteón de Galegos Ilustres para dignificalo e dotalo duns contidos acordes co seu nome", entendendo que o Parlamento sería o órgano axeitado para, de acordo coas outras institucións implicadas, colocar o Panteón baixo a súa tutela.