Son de Galicia

10-10-2019 - 30-11-2019 (ampliada ata o 08-12-2019)

Esta exposición, promovida e organizada polo Consello da Cultura Galega, ten como fin divulgar o papel que tiveron os coros galegos no desenvolvemento da cultura galega do século XX. 

Esta mostra, constrúe o seu relato narrativo a partir dos arquivos dos catro coros históricos de Galicia, cuxas formacións seguen activas na actualidade: Toxos e Froles (Ferrol, 1914), Cántigas da Terra (A Coruña, 1916), Coral De Ruada (Ourense, 1918) e Cantigas e Agarimos (Santiago de Compostela, 1921).

A mostra trata diferentes contidos que van dende os precedentes (o coro Aires de la Terra de Pontevedra), así como as actividades musicais e a labor de recuperación da música tradicional e cantigas populares, a vestimenta e a realización de escenografía propia e o deseño de arte (coa figura destacada de Camilo Díaz Valiño, entre outros), a labor filantrópica e benéfica, a proxección exterior ou o compromiso con Galicia e a súa identidade. A mostra tamén da a coñecer como os coros asumen as representacións teatrais e dramáticas e a preocupación pola conservación da lingua galega (por exemplo, a Cantigas e Agarimos débeselle a estrea de Os vellos non deben namorarse o 25 de xullo de 1961 na Praza da Quintana) e o papel de divulgación do baile e as coreografías dentro e fóra de Galicia, iniciando a tradición do folclorismo que logo explotaría o franquismo.

Este percorrido polos diferentes aspectos que conforman o riquísimo mundo do folclore galego móstrase a través de distintos paneis de imaxes, acompañados de vitrinas nas que se mostra documentación, publicacións, manuscritos, partituras e máis fotografías, ademais doutros obxectos como instrumentos, discos, vestimenta, esbozos de decorados e material audiovisual de apoio.