XI Proxecto Didáctico Antonio Fraguas

26-10-2019 - 30-11-2019

O Proxecto Didáctico Antonio Fraguas, promovido pola Fundación Antonio Fraguas Fraguas e a Consellería de Cultura e Turismo da Xunta de Galicia, está formada polos traballos dos dous centros premiados nesta XI edición. Na modalidade de ensino primario, o premio recaeu no traballo do CEIP Ana María Diéguez de Asados (Rianxo), presentado baixo o título de “Pintando o patrimonio, definimos a nosa identidade”. É unha investigación escolar que destacou pola divulgación dos elementos do patrimonio etnográfico e histórico da súa contorna e que culminou na realización colectiva dun mural para referencia da comunidade local. 

Na modalidade de ensino secundario, o proxecto seleccionado foi o titulado “Iconografía sacra e profana no concello de Silleda” do CPR María Inmaculada de Silleda, que destacou por favorecer as estratexias de investigación e divulgación que permitiron o coñecemento de manifestacións artísticas na súa contorna. A exposición poderase ver dende este 26 de outubro ao 30 de novembro.

O Proxecto Didáctico Antonio Fraguas 

A Fundación Antonio Fraguas busca lembrar a través da organización deste proxecto didáctico á figura do eminente pedagogo que fora primeiro director do Museo do Pobo Galego. Faino premiando á comunidade escolar polos seus esforzos cara a educación patrimonial, ao coñecemento da lingua e do medio e á valoración dos máis diversos elementos do noso acervo cultural, que os centros participantes realizan a través de traballos de pescuda sobre o patrimonio etnográfico, antropolóxico, lingüístico, xeográfico, histórico e artístico da súa contorna.

O Proxecto Didáctico Antonio Fraguas conta co apoio da Secretaría Xeral de Política Lingüística, e está recoñecido pola Consellería de Educación, Universidade e Formación Profesional como proxecto de innovación educativa.