X PROXECTO DIDÁCTICO ANTONIO FRAGUAS

05-11-2017 - 17-12-2017

O Proxecto Didáctico Antonio Fraguas é un xeito de lembrar a figura do eminente pedagogo que fora primeiro director do Museo do Pobo Galego, premiando a comunidade educativa polos seus esforzos cara á educación patrimonial, ao coñecemento da lingua e do medio e á valoración dos máis diversos elementos do noso acervo cultural.

Na décima edición, resolta en xuño de 2016, o xurado acordou:

1. Conceder por unanimidade un premio ao proxecto Vedr@ medra, unha aposta polo patrimonio inmaterial como eixe de dinamización lingüística e cultural nun centro educativo do rural galego, do CPI Plurilingüe de Vedra, considerando que consegue implicar non só a comunidade educativa senón tamén distintos axentes sociais e culturais co fin de darlle valor á riqueza lendaria e toponímica das parroquias e contorna do Concello de Vedra.
2. Conceder por maioría un premio ao proxecto Figuras de antonte e de onte. Figuras para o mañá, do IES A Pinguela de Monforte de Lemos, destacando a novidade de poñer o acento na recollida das manifestacións plásticas na arqueoloxía e na arquitectura tradicional, e polo feito da súa proxección con novas experiencias artísticas cara ao futuro.

O Proxecto Didáctico Antonio Fraguas conta co apoio da Secretaría Xeral de Política Lingüística, e está recoñecido pola Consellería de Cultura, Educación e Ordenación universitaria como proxecto de innovación educativa.