Retrospectiva Entre Amigos (1999-2015)

06-05-2017 - 25-06-2017

A “Retrospectiva Entre Amigos”, organizada pola Oficina de Socias e Socios co gallo da conmemoración do 40 aniversario do Museo do Pobo Galego, mostra unha escolma das fotografías presentadas nas oito edicións da exposición “Entreamigos”, pretendendo manter, dun lado, o seu valor etnográfico e, doutro, a calidade, dando cabida a todas as persoas socias que participaron.

            En 1999, e por iniciativa da entón socia (e agora patroa) Rosa Méndez, faise un chamamento a socias e socios do MPG para organizar unha mostra de fotografía etnográfica que os achegase máis ás actividades do museo e de xeito que reforzasen as relacións entre a institución e as persoas que se integran nela. O éxito da iniciativa favoreceu a continuidade deste tipo de mostras, converténdose nun evento bienal.

            Co gallo do 40 Aniversario do MPG decidiuse homenaxear a quen contribuíron ao longo destas oito edicións, coa achega das súas fotografías e visións particulares da etnografía e da antropoloxía, reunindo un conxunto de cadaquén. Desta maneira a mostra comprende unha significativa variedade temática desde a arquitectura popular, festas e romarías, oficios ata a interpretación subxectiva e abstracta de sentimentos, e incluso traballos etnográficos sobre outras culturas alleas á nosa.