O espello do mar. Cartas náuticas de Galicia

02-05-2017 - 25-06-2017

Andar polo mar sen perigo foi un dos segredos mellor gardados polos antigos navegantes. Cómpre agardar ao século XIII para que coa difusión das primeiras cartas, o coñecemento empece a ser patrimonio cada vez de máis persoas, ata que se converte de todos ao saíren as primeiras impresas na segunda metade do século XVI.

            Algunhas limítanse a unha determinada parte da nosa costa, como as rías, pero son as menos, porque a inmensa maioría abarca moita máis extensión, non sendo o noso mar máis que unha porción do que se representa. Na presente mostra hai exemplares de ambas as dúas.

Están ordenadas cronoloxicamente, de forma que se poida comprobar a evolución das técnicas de reprodución, así como a incorporación dos novos coñecementos e descubrimentos, sendo cada vez máis fiables tanto polo que atinxe ás distancias, como aos accidentes xeográficos. O Museo do Pobo Galego posúe moitas máis, na súa maioría pertencentes á colección de Clodio González Pérez, pero como non é posible expoñelas todas houbo que facer unha selección na que entrasen exemplares antigos e modernos, que permita levar a termo un estudo comparativo ao longo dos séculos.

A beleza das cartas depende do gusto de cada época e da sabenza dos deseñadores e gravadores, sobresaíndo neste aspecto as máis antigas que aínda lembran a fasquía das medievais, nas que aos motivos ornamentais, reais e fantásticos, dábaselle case tanta importancia como á información propiamente náutica.

            Os sistemas dixitais actuais son moito máis seguros, pero carecen do encanto destas vellas cartas de papel.