A idade do ferro. Fotoensaio de José M. Salgado

02-03-2017 - 23-04-2017

Dacabalo entre dúas provincias, Lugo e Oviedo, nas concas dos ríos Eo e Navia, pervive unha comunidade humana, vinculada á labranza do ferro desde tempos remotos. Nos concellos galegos de Riotorto, A Pontenova e A Fonsagrada, e nos asturianos de Os Oscos, Grandas de Salime e Taramundi, habitan aínda decenas de artesáns do ferro, ferreiros, herdeiros dunha tradición ininterrompida e que segue aínda hoxe viva.

Este fotoensaio trata de ser un retrato fiel no momento actual dunha comunidade homoxénea e coherente, ao seu modo, que permaneceu para moitos galegos e asturianos ignorada.

Baixo o fío sincrónico da serie de retratos que forman parte desta exposición, esténdese outro relato diacrónico no que o momento presente forma parte dun continuum espazo-temporal ininterrompido, unha longa Idade do Ferro, que só é posible entender cunha visión totalizadora, na que o pasado nos dá as claves necesarias que explican o presente.

José M. Salgado. A Coruña, 1968

Xornalista e fotógrafo, colabora ou promove distintas actividades relacionadas coa difusión cultural, comisariado de exposicións, edición de libros, etc… No eido fotográfico, a fotografía documental é unha das ramas que máis cultiva. A presente exposición forma parte dun proxecto máis amplo que verá a luz ao longo do presente ano en forma de libro.