Formas tradicionais da cerámica popular: SAMOS

02-10-2014 - 02-11-2014

Comisariada por Luís Hixinio Flores Rivas e Orlando Viveiro Veiga, a mostra busca a posta en valor da olería tradicional galega a través do coñecemento centrándose, nesta ocasión, na cerámica elaborada en Samos. Esta escolma de pezas, cunha cronoloxía que vai desde 1700 ata mediados do século XX, é un exemplo das tipoloxías e formas que se produciron nos obradoiros deste concello lugués.

As referencias documentais amosan unha plena implantación desta olería no couto de Samos desde o século XVIII ata os anos 50 do século XX, constando a presenza de artesáns cacharreiros, coñecidos tamén coma barraxeiros ou louceiros. As parroquias que contaban con obradoiros eran Renche, Loureiro, Couto e Romelle en Samos, e a veciña Calvor no municipio limítrofe de Sarria. Traballaban, segundo as referencias, en rodas altas, a pesares das deformidades que se deixan ver en moitas pezas destes obradoiros.

Ademais de reunir un conxunto inédito de pezas, achegadas por diversos prestadores, de coleccións como a de García Alén e do fondo do propio Museo do Pobo Galego, o labor dos investigadores deu lugar a un extenso traballo de campo para documentar o proceso de elaboración desde o inicio ata o acabado das pezas. Esta pescuda permitiulles exhumar de entre as silveiras algúns vellos fornos para a cocción da cerámica, de características particulares, dos que a memoria estaba practicamente perdida.