Mercé á colaboración da Rede Museística provincial de Lugo, o Museo do Pobo Galego presenta a exposición sobre a traxectoria de Isaac Díaz Pardo como promotor e deseñador das cerámicas de O Castro, Magdalena (Arxentina) e Sargadelos, e mais do Laboratorio de Formas.

Esta singular exposición, a primeira que se realiza sobre esta faceta artística de Díaz Pardo á que consagrou gran parte da súa vida, inclúe bosquexos orixinais dalgunhas das pezas que se expoñen, que ven a luz por vez primeira. Hai que subliñar tamén que moitas das obras que conforman a mostra son descoñecidas e outras son prototipos de pezas que non se chegaron a comercializar ou que xa están esgotadas hai moito tempo.

Díaz Pardo (1920-2012), que foi presidente do Padroado do Museo do Pobo Galego, é recoñecido pola súa traxectoria como artista plástico; como creador de empresas que elevaron o deseño galego a un nivel superior e o difundiron por todo o mundo; como benefactor que empregaba gran parte dos rendementos desas empresas en financiar entidades que acolleron artistas e investigadores novos e vellos; e, finalmente, como un dos primeiros valedores da memoria histórica de Galicia