Co pé na premedeira, un recoñecemento ás traballadoras do tear

23-01-2014 - 02-03-2014 (ampliada ata o 23-03-2014)

O Museo do Pobo Galego inaugura o vindeiro xoves, 23 de xaneiro, unha exposición temporal de produción propia que pretende reivindicar o oficio das tecelás. O oficio de tecelá era exercido case exclusivamente por mulleres que como aquela da cantiga teñen  “... o pé na premedeira e a lanzadeira na man” achegando importantes ingresos á economía da casa.

Nesta exposición temporal, poderanse contemplar pezas da colección do MPG que están normalmente gardadas nas salas de reserva. Trátase de pezas realizadas en liño ou la, con técnicas como o gurullo ou o repaso e cun gran abano de deseños e cores. O lucimento e variedade móstrannos a riqueza e creatividade que hai na cultura popular.

O instrumento fundamental para a realización destas pezas únicas é o tear, a máquina que elabora o tecido a partir de fíos. Na exposición contarase tamén con este elemento e con outros precisos para o laborioso ritual necesario para o funcionamento do tear.

A mostra vai estar aberta desde o 23 de xaneiro ao 2 de marzo no andar do claustro do Museo do Pobo Galego e a entrada será gratuíta.