A colección étnica de Eugenio Granell

21-06-2012 - 02-09-2012

A Fundación Eugenio Granell celebra este ano 2012 o centenario do nacemento na Coruña de Eugenio Fernández Granell. O artista nunca esqueceu a cidade de Santiago de Compostela, na que viviu a infancia e a adolescencia, e por iso, a súa Fundación celebra este evento amosando a súa obra e tamén o importante e rico legado que forma os fondos da Fundación, nun proxecto que conseguiu involucrar as principais institucións culturais de Santiago de Compostela.

Cando en 1995 se constitúe a Fundación Eugenio Granell, o Museo do Pobo Galego acolleu as coleccións por vez primeira. Esta exposicións, comisariada por Natalia Fernández Segarra, recolle as obras máis representativas da colección étnica de Granell, quen, coma moitos dos seus compañeiros surrealistas, compartía coas culturas étnicas unha percepción similar do obxecto.  As culturas étnicas atribúen aos obxectos un espírito propio. As máscaras, esculturas e outros obxectos personifican espíritos que durante os rituais posúen unha grande importancia, transformando o individuo que os porta. Para os surrealistas, a capacidade dun obxecto de evocar imaxes mentais e, a través delas, emocións poderosas, dota o obxecto do marabilloso.