Entre amigos

07-05-2011 - 05-06-2011

A VI edición de Entre Amigos, exposición de fotografía etnográfica das socias e socios do Museo do Pobo Galego, conta, desta volta, coa participación de 14 socios que presentan 16 series  (máis de 140 fotografías), e cunha nova sección dedicada ao debuxo etnográfico, coma homenaxe a Xosé Pena Sanz (1945-1995), que foi debuxante do Museo do Pobo.

Os bloques que a compoñen son as intervencións do home na natureza (Lois Gutiérrez Faílde con Os Vixías e Hixinio Flores con Marcos divisorios de grandes extensións), o mundo mariñeiro (Xesús García Devesa con Subindo motores, Rosa García-Orellán con Mulleres do século XXI, Fuco Sanjiao con Na seca (Prohibico mariscar)  e Lino Lema con dúas series, O porto de Quilmas e Mudan os tempos, mudan as vontades), a Galicia agrícola (Hixinio Flores con O emprego polo home da súa propia imaxe para producir espanto e Xoán Ramón Marín Martínez con A seitura en Manzaneda), o mundo relixioso-festivo (David Conde con A romaría do Santo Cristo da Agonía, Manuel Vilar Álvarez con O carballo santo de San Fins de Cambeda e Clodio González Pérez con Tempo de flores, tempo de amores), o ámbito urbano (José María Laredo Cordonié con Memoria da vida urbana, Xoán Xosé Molina con Enrasadas e Manuel Calviño con A carón) e pecha a exposición a serie sobre Níxer de Nieves Herrero, A nena que xoga cunha botella de plástico.

Na sección homenaxe conta con debuxos etnográficos do propio Xosé Pena e coas colaboracións de María Caamaño Roig, José María Laredo Verdejo e Xoán Ramón Marín Martínez.