O Museo do Pobo Galego, en colaboración coa Concellería de Medio rural e Turismo da
Estrada e a Asociación Rapa das Bestas de San Lourenzo de Sabucedo, presenta a exposición dos
traballos seleccionados no II Concurso Internacional de Fotografía “Rapa das Bestas”,
celebrado o pasado outono.

Entre as 36 series presentadas ao concurso, o xurado resolveu conceder o premio á titulada
“A lenda do tempo”, de Alfonso Durán Castillo, considerando que “se trata dun traballo no
que o seu autor se atreveu a escoller un momento particular da Rapa, resolvéndoo nunha
serie fotográfica compacta de gran contundencia e mestría”. A exposición e catálogo inclúen
tamén outras series que, “ou ben contan cun estilo persoal que aporta unha concreta e
interesante visión da festa da Rapa, ou ben inclúen fotografías singulares de gran calidade”.

A segunda edición do concurso fotográfico en torno á rapa das bestas de Sabucedo
consolídase como un encontro de referencia para profesionais e afeccionados á fotografía.
Cada ano, o curro de Sabucedo convértese nun auténtico “couto fotográfico”, a máis da súa
recoñecida condición de icona das tradicións galegas. O nivel de cantidade e calidade das
fotografías presentadas increméntase en cada convocatoria, contribuíndo a mellorar a oferta
das variadas visións que xera a rapa.