Descubrir, explorar e comprender o longo proceso de formación da gastronomía galega e dos seus pratos durante máis de dous mil anos de Historia é o obxectivo da exposición promovida por Turismo de Santiago para o Fórum Gastronómico 2010.

Os visitantes que pasen polo Museo durante o mes de febreiro experimentarán dous mil anos de historia gastronómica cun programa diverso de actividades, espectáculos e experiencias ao redor da exposición.

Fotografías de gran formato, recreacións en 3D, infográficos, audiovisuais e accións interactivas levarán o visitante a través de retratos de interiores domésticos, de cociñas de diferentes épocas aínda en uso e dos seus propietarios, para amosar os elementos de continuidade e discontinuidade na construción das cociñas galegas. Empregando as cociñas domésticas como fío condutor, poderase descubrir cando e como aparecen produtos, tecnoloxías, técnicas e pratos ata chegarmos á actualidade, amosando a gastronomía como un dilatado e complexo proceso cultural. Os propios visitantes poderán formar parte da exposición gravando en vídeo a súa memoria vital sobre as antigas cociñas e a gastronomía.