Esta exposición forma parte dunha serie de mostras documentais a través das cales preténdese dar a coñecer os fondos que a Biblioteca do Museo alberga.

Os programas das festas do Apóstolo Santiago que aquí presentamos proceden dos fondos propios do Museo e das coleccións de Antonio Fraguas, Manuel Beiras, Blanco Cicerón e Uxío de la Riva Pol depositadas na institución. Esta serie, composta por máis de cen exemplares, abrangue cronoloxicamente os séculos XIX a XXI (1869-2009), 140 anos que nos permiten ver a evolución da festa, as actividades e actos que a conforman, as diferentes correntes artísticas aplicadas ás artes gráficas, a utilización da fotogrfía, primeiro no interior e logo nas portadas, a importancia dos deseñadores e dos publicistas. Non faltan nestes caderniños as obras de grandes artistas: pintores como Maside, Díaz Valiño, Juan Luís, Villafínez, os gravados de Mayer ou as fotografías de Vilasó ou Tino Martínez, entre outros.

Programas que nos achegan á sociedade no seu aspecto lúdico pero que, ao tempo, son a imaxe dunha arte cada vez máis reivindicada, a arte gráfica, quizais a mellor definidora das distintas épocas e tendencias.