A Vía da Prata. Unha calzada e mil camiños.

11-12-2008 - 25-01-2009

Baixo o comisariado de Enrique Cerrillo e Ana Montalvo, é un percorrido pola xeografía das comunidades que atravesa esta vía -Estremadura e Castela e León- e as súas ramificacións cara a Andalucía, Galicia e Asturias.

A Vía da Prata enlazaba as poboacións de Mérida (Emerita Augusta), capital da Lusitania, e Astorga (Asturica) e a elas uníanse moitos territorios a través dunha rede de camiños secundarios, o que a converteu nun eixo vertebrador do occidente peninsular.

Este eixo, inzado de manifestacións culturais de pobos moi dispares que viviron ou foron chegando á Península Ibérica, serviu de canle difusora que levou unha gran variedade de innovacións cara a todos os puntos do seu itinerario. Ao mesmo tempo, a súa función comercial fixo posible o desenvolvemento de verdadeiros núcleos economicamente poderosos.

A mostra, que se inaugura agora no Museo do Pobo Galego, recrea a través dunha trintena de paneis didácticos os pormenores das diferentes etapas que constitúen a Vía da Prata. Xunto a eles expóñense preto dun cento de pezas que ilustran as diferentes pegadas que, desde a protohistoria e ao longo de tres milenios, depositaron nas marxes desta calzada as distintas culturas que percorreron a Península Ibérica. Pegadas que se materializan na exposición a través de obxectos e réplicas de ourivería, cerámica, relevos, epigrafía, réplicas de esculturas, arxilas, vidros, útiles de tear, material de construción, facsímiles con repertorios de todos os camiños de España, maquetas de maquinaria de construción romana, miliarios… As pezas proceden dunha decena de institucións e coleccionistas privados como a Biblioteca Central da Universidad de Extremadura, o conxunto arqueolóxico de Itálica, o Museo Arqueológico de Asturias, o Museo Arqueológico Nacional, o Museo Arqueológico de Sevilla, o Museo de los Caminos de Artorga, o Museo Provincial de Lugo, o Museo Nacional de Arte Romano de Mérida, o Museo de Reproducciones Artísticas, o Museo de Salamanca, o Museo de Zamora, ou o Parque Arqueológico Natural de la Campa Torres.