O prematuro pasamento de Xenaro Martínez, en plena madureza da súa traxectoria como fotógrafo, foi fondamente sentido polos seus moitos amigos e coñecidos, entre os que deixou unha pegada perdurable pola súa calidade profesional e humana. Esta conmoción fixo xurdir espontaneamente entre algúns de nós o desexo de manifestar a estima que sentimos por el. E o Museo do Pobo Galego, institución da que foi socio e coa que mantivo unha relación de colaboración xenerosa, asumiu o compromiso de organizar en 2008 esta mostra, que conmemoraba o primeiro aniversario da súa desaparición. Nesta chuviosa primavera queremos dar a quen nos visitan unha nova oportunidade de gozar da beleza e tenrura das súas imaxes.

Baixo a organización de Mercedes Rozas, tamén socia do Museo, e de Xosé Ramón Fandiño, membro do noso Padroado, reuniuse unha antoloxía dos traballos de Xenaro Martínez sobre o patrimonio histórico e a paisaxe, con algunhas incursións no ámbito da fotografía etnográfica. Procurouse recoller as imaxes máis persoais, algunhas delas inéditas, que son testemuñas patentes da visión estética e poética do fotógrafo.